Etapa 1, A Caridá - Mondoñedo

Salgo bien ceo de A Caridá (parando en Ribadeo a mercar unos playeros, que los dexé en casa... Menos mal que tienen decatlon). Hasta aquí llego acompañáu pol coche de Paco. Dende Ribadeo salgo pela nacional, pero como nun veo señales del camín, prendo'l gps y mándame pelos montes, per caleyes y pistes vieyes. Tengo que facer dellos intentos porque dalgunes tan zarraes pol árgoma, escayos, cotolles y demás.

Dempués de cásique 10 km perdíu pelos montes, opto por guiame como bon scout pola brúxula y el mapa, y llego al pueblu de Vilela, dende equí ye too carretera, lo más d'ello cuesta abaxo y gano tol tiempu que perdí. Dempués de caleyar per camininos más o menos asfaltaos, Lourenzá!. Como son les 2:30, como un bocata (una barra de cuartu entera) y tomo un café. A les 3:30 decido siguir hasta Mondoñedo, por amenorgar la etapa de mañana, que ye too cuesta arriba. Sigo les indicaciones del camín, polo qu'en munchos tramos tengo que posame y emburriar la bici. Les indicaciones de la xente de los pueblos nun valen más que pa desanimase (entrugo: "esti camín ye too cuesta arriba?", y respuéndeme una muyer "bueno, hai de todo"... De too, menos llanu y cuesta abaxo).

Dempués de pasalo abondo mal col testeru'l sol dando fuerte, llego a Mondoñedo. Allí un vieyín dizme que tengo que dir enantes a la Policía Local pa reservar plaza nel albergue. Voi, pago los 6 € que cuesta dormir y xubo a duchame y descansar. Dempués una vueltina pel pueblu. Charres sobre lo de que'l rei abdicó colos pelegrinos y pa la cama ceo. Mañana va ser un día duru. Bones nueches.

Que sepa'l mundu qu'en marcha toi

Marcho pa Santiago. Solu. Como aveza dir el mio primu Juanín al que tanto almiro, unsupported. Pa qué? Nin yo mesmu toi seguru, pero sé que voi dir sabiéndolo quilómetru a quilómetru. Como Resines, voi pidi-y cuentes al Rei (esta vegada ye al Rei de Reis, que soi bien poco monárquicu pa dir escontra l'otru). Porque busco respuestes, porqués, razones pa tanta inxusticia, pa tantu fiu de puta... Voi polos que nun puen dir (Mari Loli, les neñes, los que yá morrieron, los que m'acompañarán pa la próxima y los que yá lo fixeron, los que tán sofitándome nesta vida...) Faime falta romper, valtar muries na vida y reflexonar, rezar, alcontrame cola naturaleza, cola xente del camín y les sos andances...

Esta primer etapa ye la más cenciella... Porque ye en coche. Salgo de la catedral, pelegrinando a san Salvador, porque'l que va a Santiago y nun va a San Salvador, visita al criáu y dexa al Señor. Énte la so imaxe (previu pagu inescusable de la entrada a la catedral) inclínome y pído-y fuerces, namái eso (tu dame fuerces, que yá te pidiré más coses según vaigan pasando los quilómetros). Garro'l coche y salgo p'A Caridá. Gran pueblu, gran xente, y gran cura que tienen (anque la ilesia seya un cabanón féu).

Yo soi scout, medré con una mochila a la espalda y asina voi dir, cola pañoleta y la mio mochila al llombu. Munchos dícenme que ye una llocura nun llevar l'equipaxe n'alforxes pero yo soi neciu y nun me paez que me vaiga pesar muncho, pesa 7 kg. Amás afáyome más cómodu cola mochila, como siempre salí (nun sé, zunes que tien unu). La ropa xusto, sacu dormir, una llinterna, platos y cubiertos, preseos pa llavame, la pañoleta de Scouts L'Arfueyu, les banderes d'Asturies y de Méxicu y poco más. Y por supuestu, el móvil, y una placa solar pa cargalu y nun quedar ensin batería por actualizar esti blogue, pa dir faciendo milenta semeyes y apurriéndovosles (anque nun prometo nada). Tenía mieu nun cubrir saliendo dende A Caridá los 200 km necesarios y yá taba pensando delles falcatrúes posibles, llamé a la Oficina del Pelegrín de Santiago y polo visto, lo que voi facer son 222 km (númberu guapu). A ver qué marca el cuntaquilómetros dempués, que de la exautitú de los gallegos nun pue fiase ún.